16-21 сентябрьдә башкалабызда“Иң яхшы туган тел һәм туган әдәбият укытучысы” Бөтенроссия һөнәри конкурсының йомгаклау этабы узды. Быел анда Россиянең 79 төбәге укытучылары һәм тәрбиячеләре катнашты.
Педагоглар Россия халыкларының 36 телен тәкъдим иттеләр, алар арасында халык саны ягыннан күп булган милләт телләре дә, аз санлы халыкларның телләре дә бар иде.
Конкурс РФ Мәгариф министрлыгы тарафыннан 2022 елда гамәлгә куелган.
Казан шәһәре Идел буе районы19 нчы гимназиясенең туган татар теле укытучысы Ләйлә Гарифҗанова “Иң яхшы туган тел һәм туган әдәбият укытучысы - 2024” Бөтенроссия конкурсында икенче урынны яулады.
Җиңүчеләрне бүләкләү тантанасы Идел буе дәүләт физкультура, спорт һәм туризм университетында узды.
Икенче урын өчен бүләкне Ләйлә Гарифҗановага Россия Федерациясе Президентының эчке сәясәт департаменты башлыгы, конкурсның жюри рәисе Татьяна Вагина һәм Дәүләт Думасы депутаты Илдар Гыйльметдинов тапшырды.
Ләйлә Фаяз кызын җиңүе белән котлыйбыз.