Алтыным, диярләр,
Көмешем, диярләр.
Һич ашап туймаслык
Җимешем, диярләр.
Күңелеңә салып куй:
Алтыннар сатыла.
Җимешләр кимерелеп
Бер читкә атыла.

Былбылым, диярләр,
Күз нурым, диярләр.
Син - җырлап туймаслык
Үз җырым, диярләр.
Истә тот: былбыллар
Сайрамый гел генә.
Иң матур җырлар да
Тияләр күңелгә.

Бар нәрсә туйдыра,
Бар нәрсә искерә.
Сөюгә дә хәтта
Икенче төс керә.
Әзер бул тормышның
Рәхимсез көченә.
Бик күп көч кирәк шул
Яшәргә кешегә.
Фәнис Яруллин "Көч кирәк"