Хөрмәтле хезмәттәшләрем, сайтымда сезнең өчен файдалы мәгълүмат тупланды. Анда минем эш тәҗрибәмнән кала, сез эш программалары да, дәрес эшкәртмәләре дә, хәтта татарча тавышландырылган файдалы видеоязмалар да табачаксыз.
Иң мөһиме, татар теле мөгаллимнәре өчен кирәк булган иң кызыклы сылтамалар биредә тупланган.
Шулай ук укучыларым иҗат иткән хикәя һәм шигырьләрне дә мин сайтка куйдым.
Тәүлекнең хәерле минутлары булсын, хөрмәтле хезмәттәшләрем!
Мин, Шәрәфетдинова Ләйсән Вазыйх кызы, Казан шәһәре Идел буе районы «114 нче урта гомуми белем мәктәбе» гомуми белем муниципаль бюджет учреждениесенең 1 категорияле туган (татар) теле һәм әдәбияты укытучысы.
Укытучы һөнәрен сайлавыма да шактый вакыт үтеп киткән. Еллар бер-бер артлы агалар да агалар. Тормыш китабым калыная, тәҗрибәм авырая, саллылана. Һәр үткән көн тормышымда үзенә генә хас бер эз калдырып, мәңгегә, кире кайтмаска, вакыт чоңгылына тәгәри. Күпме эшләр эшләнелде, күпме укучыларга туган тел бизәкләре җиткерелде, ике юл чатында калган күпме бала, ана телендә әйтелгән киңәшләргә колак салып, дөрес юлны сайлады. Күбесенә ярдәмем тигәндер. Чөнки һәр көнемне милләтемнең асыл телен йөрткән укучыларыма туган телебез- татар телен өйрәтү белән беррәттән, татар халкының гореф-гадәтләрен, йолаларын, халкыбызның инсафлы, тәрбияле булуын ассызыклап үткәрәм. Бу юл катлаулы, ләкин нәтиҗәле. Авыр, ләкин мавыктыргыч. Мәшәкатьле, ләкин күңелле.
